Rubianonan ta Celebra Carnaval 66 na Groningen


Un di e temporadanan cu hopi Arubiano ta haya falta di dje ora cu nan ta studia afo, sigur ta Aruba su dushi Carnaval. Hopi studiante bibando den exterior sa bay Aruba pa pasa un siman of dos y disfruta di e tradicion carnavalesco cu nan a lanta cu ne. Tin par ta keda un siman extra despues di aña nobo p'asina disfruta di e dushi 'Fakkel Optocht'.


Naturalmente, no ta tur aña esaki ta posibel. E aña aki, Cult Academy a dicidi di tuma control di e situacion y a organisa nan mesun evento carnavalesco, "Frega Riba Dje” 🎭!



E evento a tuma lugar ariba 8 di februari 2020, unda cu mas di 30 persona a bay Groningen pa asina pasa un anochi divertido, cu decoracionnan atractivo y creativo, hopi chiste y sin lubida e 'bon vibe'. Un cos ta sigur, e anochi NO a laga di desea,


"Tur cos a cuminsa como un idea pret, despues nos a dicidi di haci un eleccion, un parada, y asina hende a cuminsa tum'e mas na serio, pero ta pa pret nos a organis'e.", Kaylee a expresa.

Mas cu siguur, no por tin un bon fiesta sin un MC cu por sigura cu e bacchanal vibe sigui henter anochi. Un cu siguur tawata sa con pa haci esaki despues di un paar di shots ta MC Joker 🃏, Shardee! Den pasado, Shardee a anima e evento 'All Hallow's Night' pa Halloween, y a demostra di sa con pa buta ambiente y captura e atencion di e publico.


Den e entrevista cu Kaylee-Sue, miembro di Cult Academy, e la menciona cu tur ora cu nan organisa un fiesta, nan gusta haci algo 'extra'. Den e caso aki, e algo 'extra' ey a bira un 'Gender-neutral Election'.



"E idea a bin door cu nos tawata kier a haci algo pa hende muher y homber. Dus, eynan nos a dicidi di organisa algo unda tur hende por participa. No ta nada si bo ta un guy full macho y dijs kier conta joke, e ta gewoon pa pasa pret."

E ganador cu a haya e titulo di 'Cults Royalty', finalmente, a bira participante #3 – Juliette-Xiñha Danjo. "Xiñha tur dia", cu tambe a gana 'Best Speech,' 'Best Costume,' y 'Baddest Bitch'. E la wordo eligi door di e huradonan cu tawata tin un set di criteria na con pa kies e ganador, "E tawata hopi duro pa e huradonan, e no tawata facil at all!"


E 'Best Show' a keda na nomber di participante #4 – '#MissUnknown' cu ta di Venezuela. Participante #4 a anima e publico mas, tawata tin algo extra creativo door di ta misterioso cu cara tapa y tambe a trece mas diversidad den cantica.



Na banda di e eleccion, tambe tawata tin un ruta di carnaval. Esaki a cuminsa den cushina, pasa den gang, dal un birada y yega den sala unda cu tawata tin e stage pa e show y speech pa e anochi.


Finalmente, Cult Academy kier menciona cu tur hende ta bon bini na nan fiestanan, y cu nan tin gruponan cu sa bin di Eindhoven, Breda, Den Haag, etc., "Esun cu 'maak e mee' e prome biaha nunca lo pensa e ora cu e ta dura den trein, 'asina bo purb'e, asina bo gust'e.'"

Cult Academy

'Cult Academy' ta un grupo di studiante di Aruba cu ta studia na Groningen – Kaylee-Sue Danies, Lizienne Maduro, Endrick de Leon y Nathalie Geerman, "Tur ora cu un bin cu un opinion, tur ta bin cu e mesun opinion. Dus asina nos tur a uni y bo por bisa nos ta un 'Cult'."


Como cu nan gusta organisa fiesta y pasa pret, nan a dicidi di cuminsa haci esaki durante temporadanan specifico di fiesta, cuminsando cu Halloween y den futuro por espera un evento pa 'King's Night'.

Disclaimer: The views and opinions expressed in this blogpost are those of the author and do not necessarily reflect the official views of Phryme Magazine.